Lukas 22.63-23.25: Wär isch Jesus?

63 Sini Bewacher hei ne usglachet u gschlage. 64 Si hei nim d Ouge verbunde u gseit: „So du Prophet, säg, wär het di ghoue?“ 65 E so hei si ne no lang plaget. 66 Wos isch Morge worde si d Afüehrer vom Vouk, d Hoheprieschter u d Theologe zämecho. Si hei Jesus i ihri Sitzig gschleipft für über ne z verhandle. 67 Dert hei si ne gfragt: „Säg endlech, bisch du dr vo Gott verschprochnig Retter?“ „O wen is würd säge, dir gloubets ja glich nid! 68 Dir wüsst immer no nüt!“, het er gseit.* 69 „I bi dr Mönschesuhn u stah i däm Moment im Zäntrum vo Gottes Würke.“ 70 Da hei si aui zäme gseit: „De bisch auso dr Sohn vo Gott?“ Druf seit er: „Itz heit dirs säuber gseit, dass is bi.“ 71 Da säge si: „Was bruche mir no me Bewise. Itz hei mirs von ihm säuber ghört.“

Kapitel 23

1 Si si aui zäme ufgschtange u si mit ihm zum Pilatus. 2 Sie hei agfange ne z verchlage: „ Mir hei usegfunge, dass dä wott üses Vouk verfüehre. Me söu em Kaiser keni Stüre me zahle. Er seit er sigi säuber e Chünig, dr Messias. 3 Dr Pilatus het ne gfragt: „Bisch du dr Chönig vo de Jude?“ Er het gantwortet: „Du seisch es.“ 4 Dr Pilatus seit zu de Hoheprieschter u de Lüt drumum: „I finge ke Schuld a däm Mönsch.“ 5 Si si hässig worde u hei gseit: „Er hetzt ds Vouk i ganz Judäa uf. Agfange het er ds Galiläau itz isch er hie.“ 6 Wo das dr Pilatus ghört het gha, het er gfragt, öb dä Mönsch us Galiläa chöm. 7 So het er erfahre, dass dr Herodes für dä Fau zueständig wär, u er het ne witer zum Herodes gschickt. Dä isch denn grad z Jerusalem gsi. 8 Dr Herodes het sich sehr gfröit Jesus z gse. Er het ne nämlech scho lang mau wöue lehre kenne. Er het viu von im ghört u druf ghoffet er würdi vor sine Ouge es Wunder tue. 9 Er het ne viu gfragt, aber Jesus het ke Antwort gäh. 10 Da si d Hoheprieschter u d Theologe ufgschtange u hei ihri bissige Vorwürf bracht. 11 Dr Herodes u sini Soudate heis nid ärnscht gno. Si heis luschtig gfunge Jesus es chöniglichs Chleid azlege u ne so zrügg zum Pilatus z schicke. 12 Früecher si dr Herodes u dr Pilatus no Finde gsi, aber a däm Tag si si Fründe worde. 13 När het dr Pilatus d Hoheprieschter, d Afüehrer u ds Vouk zämegrüeft. 14 Er het zu ne gseit: „Dir heit dä Mönsch zu mir bracht wiu är ds Vouk ufhetzi. Dir sit drby gsi wie ni ne usgfragt ha u i ha nüt vo däm gfunde, wo dir verzeut heit. 15 Dr Herodes o nid, süsch hätt er mir ne ja nid zrüggschickt. Loset, da isch nüt, wo dr Tod verdient. 16 I la ne la uspeitsche u när la ne la gah.“ 18 Da hei si aui zäme grüeft : „Furt mit ihm! La dr Barabbas frei!“ 19 Dä isch wägen eme Ufschtand ir Stadt u wägen eme Mord im Gfängnis ghocket. 20 No einisch het dr Pilatus uf se igredt. Er het Jesus wöue freilah. 21 Die hei aber nume no gschroue: „Chrüzige, chrüzige!“ 22 Er hets no es dritts mau probiert u het zu ne gseit: „Was het er de Böses gmacht? I ha ke Schuld gfunge wo dr Tod verdient. I la ne la uspeitsche u när la ne la gah.“ 23 Da hei si mega lut afa tobe. Um ds Töde hei si wöue dass er gchrüziget wird. 24 Da het dr Pilatus entschide, dass si söue übercho, was si wei. 25 Er het dä frei glah, wo wäge Ufruehr u Mord isch im Gfängnis ghocket. Jesus aber het er ne usgliferet für mit ihm zmache was si wei.

*Zitat aus dem Song „079“ von Lo&Leduc, 2018.

©2014, Köniz, Philipp Kohli, www.nöi.ch

Play