1 Gott het wöue, dass i, dr Poulus, e Botschafter vo Jesus Christus bi. Drum schriben i euch in Ephesus dä Brief. Euch, wo dir zu Gott ghöret u a Jesus Christus gloubet. 2 I wünsche euch Gnad u Fride vo Gott, üsem Vatter u vo Jesus Christus, em Herr. 3 I lobe Gott, dr Vatter vo üsem Herr Jesus Christus. Er het üs in Christus mit auem geistleche Säge us em Himmu gsägnet. 4 Wiu i Christus het Gott üs scho vor dr Schöpfig drzue bestimmt, dass mir söue zuen ihm ghöre u aus Mönsche söue vor ihm stah wo nüt ane uszsetze isch. 5 Us Liebi het er vo Afang a wöue, dass mir dür Jesus Christus sini Ching söue si. Das isch si Plan gsi – u dä het ihm gfaue! 6 Drum wei mir Gott für die herrlechi Gnad lobe, won er üs dür si gliebt Sohn gschänkt het. 7 Wäg ihm si mir frei, wiu er mit sim Bluet für üs zaut het. Das wo mir fautsch gmacht hei zeut nüt meh, wiu sini Gnad es so viu wärt isch. 8 Er het se üs im Überfluss gschänkt u drzue no aui Wisheit u Verschtang. 9 Für das mir ds Ghemnis vo sim Wiue chöi verstah. Nämlich si guet Plan, wo sich in Jesus zeigt het. 10 Er wird zur rechte Zyt wird Würklechkeit wärde. Unger dr Herrschaft vo Christus wird im aues im Himu u uf dr Ärde zämefinge. 11 In ihm si mir scho vo Afang a aus Erbe bestimmt worde. U das, wo Gott planet, macht er o so, wien ers wott. 12 Drum söue mir, wo scho itze uf Jesus hoffe, ihn und sini Herrlichkeit rüehme. 13 Dir ghöret o drzue. Dir heit die wahre Wort vor guete Nachricht vo euer Rettig ghört. Dir heit gloubt u dir heit dr Heilig Geischt übercho, wo wien es Sigu bewist, dass dir ganz zu Gott ghöret. 14 Er isch d Garantie für das, wo Gott versproche het: D Erlösig vo aune wo zun ihm ghöre für dass si sini Herrlechkeit priise. 15 I ha so viu Guets vo euch ghört. Dir gloubet a Herr Jesus u dir zeiget aune wo zu Gott ghöre eui Liebi. 16 Drum chan i nid üfhöre für euch z danke u i mine Gebät a euch z dänke. 17 I bitte, dass dr Gott vo üsem Herr Jesus Christus, dr Vatter vor Herrlechkeit, euch dr Geischt vor Wisheit u vor Offebarig git, für dass dir ihn erchennet. 18 Er söu euch d Härzensouge uftue für dass dir gseht, zu was fürnere Hoffnig dir beruefe sit u wie rich und herrlech das isch, wo Gott dene versproche het, wo zun ihm ghöre. 19 U wie riesig gross sini Chraft isch, wo in üs, wo mir a ihn gloube, wirkt. Es isch di glichlegi gwaltegi Sterchi 20 wo o i Chrischtus gwürkt het. Si het ihn vo de Tote uferweckt u ihn zu sinere Rechte im Himu igsetzt. 21 Dert isch er über aune Wäutrich, Herrscher u Mächt. Er steit über auem wo Rang u Name het. Nid nume i dere Zyt sondern o i dere wo chunnt. 22 Aues het Gott sinere Herrschaft ungersteut. Mit dere Autorität isch er o dr Herr vor Gmeind. 23 Si isch si Liib. Si isch erfüllt vo däm wo alles efüllt.
©2014, Köniz, Philipp Kohli, www.nöi.ch
Podcast: Play in new window | Download