1 O euch erfüllt Christus u macht euch läbig. Früecher sit dir tot gsi wäg eune Sünde u däm wo dir fautsch gmacht heit. 2 Dir heit gläbt wies hüt uf dr Wäut aui mache wo nid uf Gott lose. Si si verfüehrt vom mächtige Geischt wo zwüsche Himu u Ärde regiert. 3 So wie si hei mir früecher aui o gläbt. Mir hei de egoistische Glüscht nachegäh u drby nume für üs säuber gluegt. Eso wie mir si gsi, hei mir Gottes Zorn verdient. Mir si nid besser gsi aus aui angere. 4 Aber Gottes Erbarme isch riesig gross. Wiu er so vou Liebi isch, het er o üs gliebt. 5 O we mir i üsne Sünde für ihn wie tot si gsi het er üs mit Christus zäme läbig gmacht. Es isch Gnad, dass dir grettet sit. 6 Er het üs zäme mit Jesus Christus uferweckt un is e Platz im Himu gäh. 7 Bis i aui Ewigkeit wott er eso zeige wie überfliessend rich sini Gnad u sini Güeti isch, won er üs i Jesus Christus zeigt het. 8 Es isch sini Gnad, wo euch grettet het, wiu drs gloubt heit. Es isch nid wäg euch. Es isch Gottes Gschänk. 9 Nid wäg öppisem wo mir gmacht hei. Süsch chönnte mir üs säuber rüehme. 10 Gott het öppis us üs gmacht. Er het üs in Jesus Christus gschaffe, für dass mir das Guete tüe, wo Gott scho für üs vorbereitet het. 11 Dänket dra, wie me früecher wäg euere nid jüdische Herkunft uf euch het achegluegt. Die, wo das gmacht hei, si stouz gsi uf üsseri Merkmau, wo ja o nume vo Mönsche si gmacht worde. 12 Wiu dir denn Chrsitus no nid kennt heit, sit dir usgschlosse gsi vom israelische Bürgerrecht u heit ke Zuegang zum Bund vo Gottes Verheissig gha. Dir heit ke Hoffnig gha u heit ohni Gott i dere Wäut gläbt. 13 Aber itz wo dir Christus kennet isch das angers. Dir wo vorher no so wit wäg sit gsi, sit dür ds Bluet vo Jesus Christus ganz nach cho. 14 Er isch üse Fride! Er het us beidne eis gmacht. Mit sim Opfer het er dr Zun, wo trennt het, abbroche. 15 Er het ds Gsetz mit sine Regle u Gebot ufghobe. Dür ihn wärde Jude u Nidjude genau glich aus neui Mönsche gschaffe u so gits zwüsche beidne Fride. 16 Am Chrütz het er die beide mit Gott versöhnt u zu eim Liib, sinere Gmeind, zämebracht. Mit sim Tod het er d Findschaft tötet. 17 Er isch cho u het die gueti Nachricht vom Fride bracht. Fride für aui, egau öb si no wit wäg oder scho nach bi Gott si gsi. 18 Dür ihn hei aui im gliche Geischt dr Zuegang zum Vater. 19 So sit dir itz nümm Frömdi u Usländer, sondern glichberächtigti Mitbürger, wie aui angere wo o ganz zu Gott ghöre. Dir sit e Teil vom Hus vo Gott. 20 Es isch ufbout uf em Fundament vo de Apostle u de Prophete. Dr Grundstei isch Jesus Christus säuber. 21 Er het das ganze Hus zäme u macht, dass es wachst u e Tämpu isch wo Gott ghört. 22 I das geistleche Hus vo Gott her er euch mit inebout.
©2014, Köniz, Philipp Kohli, www.nöi.ch
Podcast: Play in new window | Download