1 D Ching söue ihrne Eutere fouge. Machets wiu dir zum Herr ghöret, de isch es richtig. 2 „Ehr di Vater u dini Muetter“, das isch ds erschte Gebot won es Verspräche het. 3 Nämlech, „dass es dir guet geit du du lang uf dere Erde läbsch.“ 4 D Eutere söue ihri Ching nid provoziere. Häufet ne, dass si Erwachse wärde. Gäbet ne Biudig u setzet ne Gränze. Orientieret euch drby am Herr. 5 D Sklave söue ihrne irdische Herre glich wie Christus fouge: Gwüssehaft, mit Respäkt u ufrichtigem Härz. 6 Nid nume we sis gseh, für ne guete Idruck z mache, sondern machets aus Sklave vo Christus, wo Gottes Wiue vo Härze gern tüe. 7 Machet eue Dienst mit guetem Wiue, aus wärs für e Herr u nid für d Mönsche. 8 Dir chöit sicher si, dass aui wo Guets tüe vom Herr belohnt wärde. Das gilt für d Sklave glich wie für die Freie. 9 U dir Herre söuet uf die glichi Art mit ihne umgah. Plaget se nid! Dänket dra, dass dir beidi dr glich Herr im Himu heit. Bi ihm gäute aui Mönsche genau glich viu. 10 U öppis wott i euch zum Schluss no säge: Wärdet starch im Herr u erläbet Macht vo sinere Sterchi. 11 Leget d Wafferüschtig vo Gott a, für dass dir gäg die fise Tricks vom Tüfu e Chance heit. 12 Wiu üse Kampf geit nid gäge Fleisch u Bluet, sondern gäge Mächt u Outoritäte, gäge d Wäutherrscher vor Fischteri u die böse Geischter unger em Himu. 13 Drum packet d Wafferüschtig vo Gott. Eso chöit dir euch wehre, wes zum Kampf gäge ds Böse chunnt u dir wärdet aues überstah. 14 Stöht ‚uf‘! Zieht dr Gurt vor Wahrheit fescht um eui Huft. Leget dr Bruschtpanzer vor Grechtigkeit a. 15 Leget d Schue a, dass dr parat sit für ds Evangelium vom Fride izstah. 16 Drzue packet dir dr Schiud vom Gloube. Mit däm chöit dir aui fürige Pfile vom Böse uslösche. 17 Nämet dr Heum vor Rettig du ds Schwärt vom Geischt. Das isch ds Wort vo Gott. 18 Bättet u bittet uf jedi Art u zu jeder Zyt im Geischt. Passet mit höschter Usdur uf aui angere uf, wo o zu Gott ghöre u bättet für se. 19 ‚Bättet‘ o für mi, für dass i die rächte Wort finge, wenn i rede u offe ds Gheimnis vor Guete Nachricht erkläre. 20 ‚Bättet‘, dass i o hie im Gfängnis dr Muet hat, so z rede wies mi Uftrag isch. 21 Dir weit itz sicher no wüsse, wies mir geit u was i mache. Dr Tychikus wird euch aues verzeue. Er isch mir e gliebte Brueder un e treue Diener im Herr. 22 Wäge däm han e zu euch gschickt, dass er euch vo üs verzeut u eui Härze tröschtet. 23 I wünsche aune Gschwüschterti Fride u Liebi mit Gloube vo Gott em Vater u em Herr Jesus Christus. 24 D Gnad isch mit aune wo üse Herr Jesus Christus liebe – ohni Endi.
©2014, Köniz, Philipp Kohli, www.nöi.ch
Podcast: Play in new window | Download