Epheserbrief Kapitel 4

1 Itz, won i hie im Gfängis bi, isch mir öppis wichtig worde, won i wott, dass dirs euch z Härze nähmet: Läbet eues Läbe so, dass es zum Uftrag passt, wo Gott euch gäh het. 2 Dir söuet bescheide, fründlech u geduldig enang ir Liebi ertrage. 3 U gäbet aus, dass dir d Einheit im Geischt bewahret u im Fride verbunde blibet. 4 Es isch ei Liib u ei Geischt. Es isch ei Hoffnig, wo Gott euch druze iglade het, won er euch grüeft het. 5 Ei Herr, ei Gloube u ei Toufi. 6 Ei Gott u Vater vo aune. Er isch über aune, dür aui u i aune. 7 Jedem einzelne vo üs het er Gnad gschänkt. Drby het er sich a Jesus orientiert u so gschänkt, wien ers vorgäh het. 8 Vo ihm heissts: „Er isch ufe i d Höchi, het Gfangeni mitgfüehrt u het de Mönsche Gabe gschänkt.“ 9 We vo ufe d Red isch, de heisst das doch, dass er vorher abe cho isch üf d Ärde. 10 Dä wo abecho isch isch auso dr Glich wie dä wo ufe isch u über auem steit u aues erfüllt. 11 Er ischs wo ‚er Gmeind‘ Apostle, Prophete, Evangelischte, Hirte u Lehrer gäh het. 12 Für das aui, wo zu Gott ghöre, i ihrem Dienst trainiert wärde für das dr Liib vo Christus ufbout wird. 13 Bis dass mir aui ds Ziel erreiche, dass mir im Gloube zämehäbe u dr Sohn vo Gott geng besser lehre kenne.  U dass mir dür ds Läbe düre geng me zu Mönsche wärde wo vo Christus ganz erfüllt si. 14 Mir söue nid so unerfahre si, dass mir üs vo jedem Wind vonere Meinung löh la la umblase u uf fisi Tricks u fräche Lugine  ichegheie. 15 Mit wei i Liebi für d Wahrheit istah u geng me wie Christus wärde, wo üs i auem es Vorbiud isch. 16 In ihm isch dr ganz Liib verbunde u er macht, dass aues guet zäme funktioniert. Jede Körperteil hiuft em angere. U macht, was er cha, dass dr ganz Liib ir Liebi starch wird u wachst. 17 Was ig euch itze säge isch mir bsungers wichtig: Dir dörft nid länger wie Mönsche läbe, wo Gott nid kenne. Ihres Dänke isch ignoh vo Sache, wo ke Wärt hei. 18 Ihre Verstand isch vernäblet u si si abgspautet vom Läbe vo Gott. Ihri Härz si hert worde u si merke nid emau wies um se steit. 19 Si si abgstumpft u kenne ke Gränze. Si si gierig u mache aus wo nid suber isch. 20 Mit Christus heit dir aber öppis ganz angers glehrt kenne. 21 Dir heit von im ghört u glehrt was d Wahrheit i Jesus isch. 22 Machet Schluss mit euem aute Läbesstil. Löht euch nid vo eune früechere egoistische Wünsch la kaputtmache. 23 Lehret im Geischt uf ne nöii Art z dänke. 24 Wärdet nöii Mönsche. Läbet eso, wie Gott euch gschaffe het: Grecht u echt heilig. 25 Höret uf mit lüge! Sit ehrlech mit enang. Schliesslech ghöret dir aui zum gliche Liib. 26 We dr hässig sit passet uf dass dir ke Fähler machet. Lueget, dass dirs no am gliche Tag i d Ornig bringet. 27 Gäbet em Tüfu ke Chance! 28 Wär gstohle het, söu nümm stähle. Er söu ga schaffe u sech so isetzte, dass er gnue verdienet, dass er o no dene wo zweni hei cha häufe. 29 D Wort us euem Mu söue nid stinke wien e fuule Fisch. Redet was guet isch, was ufbout u witerhiuft. I däm, wo dir säget, söu me öppis vo Gottes Gnad gspüre. 30 Machet dr Heilig Geischt vo Gott nid truurig. Er isch wien es Sigu, wo euch d Garantie git, dass dir em Tag vo dr Erlösig zu Gott ghöret. 31 Bitterkeit, Wuet, Zorn, Umegschrei u Gottesläschterig: Au das, u überhoupt aues Böse, söu nüt mit euch ztüe ha. 32 Sondern sit fründlech u härzlech mitenang. Vergäbet enang eso, wie euch Gott in Christus vergäh het.

©2014, Köniz, Philipp Kohli, www.nöi.ch