Epheserbrief Kapitel 3

1 Wäge däm sitze ig o für Jesus hie im Gfängnis, wiu i sini Botschaft euch Nid-Jude witergäh ha. 2 Di heit ja ghört, was für ne Uftrag mir Gott i sinere Gnad gäh het. 3 Das Gheimnis, won i euch churz drvo gschribe ha, het Gott mir zeigt u erklärt. 4 Dir chöit das Gheimnis vo Christuso verstah, we dirs läset. 5 D Mönsche wo vor üs gläbt hei, hei das no gar nid chönne verstah. Aber itz hets dr Geischt de heilige Apostle u de Prophete zeigt. 6 Nämlech dass o d Nid-Jude Miterbe si, dass si zum gliche Liib ghöre u dass für sie d Verheissige genau glich gäute. Das isch die gueti Nachricht vo Jesus Christus. 7 Für die Nachricht setze ig mi i. Gott schenkt mir i sinere Gnad d Chraft dass i das cha mache. 8 I bi ja dr mickrigst vo au dene wo zu Gott ghöre. Usgrächnet i ha d Gnad übercho, de Nid-Jude die gueti Nachricht vom unfassbar grosse Richtum in Christus witerzgä. 9 Dass i für aui das Gheimnis a ds Liecht bringe, wo scho ewigs i däm Gott, wo aus gschaffe het, gschlumeret het. 10 Dür d Gmeind wird itze die viufäutigi Wisheit vo Gott aune Mächt u Gwalte im Himmu ufzeigt. 11 Dä ewig Plan vo Gott isch im Messias Jesus üsem Herr Würklechkeit worde. 12 We mir a ihn gloube si mir befreit u chöi vou Vertroue zu Gott cho. 13 Eso heit o dir Ateil a Gottes Herrlechkeit. U wenn i itz wäge däm bi unger Druck grate, de verlieret nid dr Muet. 14 Grad wäge däm beugen i mini Chnöi vor em Vater. 15 Däm Vater, wo auem im Himu u uf dr Ärde het dr Name gäh. 16 I bitte ihn, dass er euch us em Richtum vo sinere Herrlechkeit Chraft git. U dass dir dür si Geischt innerlech starch wärdet. 17 ‚I bitte,‘ dass Christus dür e Gloube i eune Härze wohnt u dass dir i dr Liebi starch verwurzlet sit u es feschts Fundament heit. 18 Für dass dir zäme mit aune, wo zu Gott ghöre, ganz chöit begriffe, was d Breiti, d Längi, d Höchi u d Töifi isch. 19 U dass dir d Liebi vo Christus, wo aue Verstang überstigt, chöit erfasse u dass dir mit dr ganze Fülli vo Gott erfüllt werdet. 20 Er isch mit sinere unerschöpfleche Chraft i üs am Wärch u er cha viu me aus was mir bitte oder üs o nume chöi vorsteue. 21 Ihn wei mir ehre. Aus Gmeind in Jesus Christus i aune Generatione wo no wärde cho bis i aui Ewigkeit. Amen.

©2014, Köniz, Philipp Kohli, www.nöi.ch